ProgramiArsimi

Investimet me qëllim përmirësimin e infrastrukturës arsimore në sistemin e arsimit parashkollor dhe parauniversitar do të jenë prioriteti ynë edhe për mandatin e ardhshëm. Kështu, do të vazhdojmë punët tona për përfundimin e 19 objekteve të tjera, pjesë e procesit të rindërtimit. Nga këto investime do të përfitojnë direkt 7367 fëmijë dhe nxënës. Veç procesit të rindërtimit, gjatë 4 (katër) viteve në vijim do të kryhen 8 (tetë) investime të tjera për përmirësimin e infrastrukturës arsimore me buxhetin e bashkisë: Rikonstruksioni i kopshtit në fshatin Shkallë, Manëz, nga ku do të përfitojnë 20 fëmijë të cilët frekuentojnë këtë kopësht. Rikonstruksion i shkollës së mesme “Dom Nikoll Kaçorri” dhe ndërtimi i palestrës së re të shkollës në zonën e Durrësit të Ri, nga ku do të përfitojnë 135 nxënës që mësojnë aktualisht. Rikonstruksion i Shkollës së Mesme të Bashkuar “Besnik Hidri” Shën Vlash, Rrashbull, nga ku do të përfitojnë 485 nxënës. Ndërtimi i ri i kopshtit dhe shkollës fillore pranë shkollës Besnik Hidri” Shën Vlash, Rrashbull, nga ku do të përfitojnë 45 fëmijë të kopshtit dhe 75 nxënës. Ndërtim i ri nga bashkimi i dy shkollave “Nënë Tereza” dhe “Vasil Ziu”, Durrës, nga ku do të përfitojnë 1200 nxënës që mësojnë aktualisht. Ndërtim i ri kopsht dhe shkollë fillore “Jusuf Hoti”, Katund i Ri, nga ku do të përfitojnë 285 nxënës dhe 50 fëmijë të kopshtit. Ndërtimi i ri i shkollës 9 vjeçare “Met Hasa”, në Porto Romano, Durrës, nga ku do të përfitojnë 189 nxënës dhe 27 fëmijë të kopshtit të cilët frekuentojnë aktualisht këto godina. Ndërtimi i shkollës 9 vjeçare “Demokracia”, në Spitallë, Durrës, nga ku do të përfitojnë 598 nxënës dhe 42 fëmijë të kopshtit të cilët frekuentojnë aktualisht këto godina. Nga këto investime do të përfitojnë direkt 3151 nxënës dhe fëmijë.

Vitet e fundit bashkia Durrës ka ofruar mbështetje financiare për të rinjtë duke dhënë bursa për të gjithë nxënësit ekselentë të shkollave 9 vjeçare dhe të shkollave të mesme. Gjatë mandatit të ri do të zgjerojmë fashën e mbështetjes financiare për nxënësit ekselentë duke përfshirë edhe nxënësit nga klasa e tetë deri në klasën e pestë. Për këtë qëllim, do të ketë një rritje të fondit të bashkisë në mbështetje të nxënësve ekselentë.

Ngritja e një strukture mbështetëse brenda bashkisë me qëllim orientimin për punësimin në tregun e punës të të rinjve që kanë përfunduar degë të caktuara të arsimit profesional është një ndër objektivat për mandatin e ri. Përmes kësaj nisme synohet ndërtimi i urave lidhëse ndërmjet profesionistëve të rinj dhe sektorit privat kyç si: detaria, turizmi apo industri të tjera, me qëllim prioritarizimin dhe ofrimin e lehtësirave në tregun e punës sipas nevojave dhe kualifikimeve të tyre. Pritet që mbi 4000 të rinj të jenë përfitues direkt të kësaj strukture mbështetëse.